عبدالرشيد ولهاري: والي بال جي مشهور رانديگر عبدالرشيد ولهاري پهرين ڊسمبر 1934ع تي ڳوٺ ميين حاجي پير محمد ولهاري، تعلقي عمرڪوٽ ۾ ميين عبدالرحمان ولهاري جي گهر ۾ جنم ورتو. ديني تعليم ڳوٺ جي مدرسي مان حاصل ڪيائين. سندس خاندان ۾ ڪيترائي عالم ۽ بزرگ هئا. فائنل پاس ڪرڻ بعد سنڌي جو استاد مقرر ٿيو. 1956ع ۾ والي بال جي مشهور رانديگر غلام محمد کوسي جي اثر هيٺ والي بال راند ۾ بهترين رانديگر تسليم ڪرايائين. جنهن بعد هن غلام محمد کوسي سان گڏجي عمرڪوٽ ۽ ڍوري ناري ۾ والي بال جا ڪيترائي ٽورنامينٽ ڪرايا. پاڻ بئڪ سينٽر جو بهترين رانديگر هو. سندس اثر هيٺ ڪيترائي رانديگر پيدا ٿيا، عمرڪوٽ ضلعي جي مختلف اسڪولن ۾ 14 سال نوڪري ڪرڻ کانپوءِ والي بال جي رانديگر ۽ ريڊيو ڪمپئر عنايت الله زنگيجي جي صحبت ۾ پرائمري ماستري ڇڏي پبلڪ اسڪول حيدرآباد ۾ پڙهايائين.هن عنايت الله زنگيجي سان گڏجي پبلڪ اسڪول حيدرآباد ۾ والي بال/ شوٽنگ بال جي ٽيم جو بنياد وڌو. حيدرآباد ۾ ٻين رانديگرن جي سهڪار سان ڪيترائي ٽورنامينٽ ڪرايائين. پاڻ ايماندار ريفري پڻ رهيو. عبدالرشيد ولهاري، والي بال کان شوٽنگ بال تائين ايسوسيئشن ۽ فيڊريشن جو ضلعي توڙي صوبائي سطح تي عهديدار پڻ رهيو.
1934.12.01 عيسوي
عبدالرشيد ولهاري پهرين ڊسمبر 1934ع تي ڳوٺ ميين حاجي پير محمد ولهاري، تعلقي عمرڪوٽ ۾ ميين عبدالرحمان ولهاري جي گهر ۾ جنم ورتو.